წელს ჯიაიჯიში ძალიან საინტერესო ტრადიციას ჩავუყარეთ საფუძველი. 15-17 მაისს პირველად შევიკრიბეთ წლიურ შეხვედრაზე წინანდალში, რათა ერთად შეგვეჯამებინა გასული 2024 წელი.

ღონისძიება განსხვავებულად ჩავიფიქრეთ, არა როგორც სტანდარტული წლიური ანგარიში, არამედ - ერთმანეთისთვის გულწრფელი გაზიარება შედეგების, საინტერესო და მნიშვნელოვანი პროექტების, მიღწევებისა და გამოწვევების.

თითოეულმა გუნდმა საკუთარი პრეზენტაცია გააკეთა, სულ 18 გამოვიდა. ვშიშობდით, რომ ერთ დღეში რთული იქნებოდა ამდენი ინფორმაციის მოსმენა, თუმცა აღმოჩნდა პირიქით, შედეგმა მოლოდინს გადააჭარბა. ჯიაიჯელებისთვის ეს ამოცანაც მარტივად ამოსახსნელი აღმოჩნდა. მათ ძალიან საინტერესოდ გვიამბეს მსხვილ პროექტებზე სხვადასხვა ინდუსტრიებსა თუ ქვეყნებში, ფინანსურ ოპერაციებზე, განსხვავებულ იურისდიქციათა საკანონმდებლო და საგადასახადო სპეციფიკაზე, აუდიტორულ თემებსა თუ შრომითი უსაფრთხოების სიახლეებზე და სხვ.  

გასული წლის შეჯამებასთან ერთად ვისაუბრეთ მიმდინარე წლის გეგმებზე და ამოცანებზე, რასაკვირველია, რა ახალი გამოწვევების წინაშე ვდგავართ, სად და როგორ ვგეგმავთ ჩვენი ბიზნესის გაფართოვებას, როგორც შინაარსობრივად, ასევე გეოგრაფიულად რეგიონში, რათა წარმატებულად განვაგრძოთ ჩვენი მისიის შესრულება.

ჩვენი თანაგუნდელების პროფესიონალიზმითა და მონდომებით, ერთმანეთს ვაჩუქეთ დაუვიწყარი დღე, დეტალურად გავეცანით ერთმანეთის საქმიანობას, მეტად დავაფასეთ თანაგუნდელები და მათი უკომპრომისო სწრაფვა განვითარებისა და კიდევ უფრო უკეთესი შედეგების მიღწევისკენ.

ჯიაიჯი ტრადიციულად  გუნდური  აქტივობებით გამოირჩევა. მეორე დღე სწორედ მათ დავუთმეთ. ნამდვილი დიდების თამაში გამოგვივიდა - სპორტული და ინტელეტუალური გართობა ერთად, მარცხი და გამარჯვება, მაგრამ საბოლოოდ  მაინც გამარჯვება, ნარინჯისფერთა გუნდმა სძლია ყველას და მოიპოვა ჯიაიჯის თასი.