იაპონელები ამბობენ ყველაზე კარგი საჩუქარი ცოდნის გაზიარებააო - ვეთანხმებით და ქართულ სინამდვილეში გვინდა გადმოვიტანოთ, ცოდნა გავუზიაროთ სხვებს, პირველ რიგში კი მომავალ თაობებს.
2025 წლის 21 სექტემბერი კი საბადოს დაბადების დღეა. მანგლისში - ძველი დანგრეული სკოლის ნაცვლად დღეს თანამედროვე სტანდარტების, არაფორმალური განათლების ცენტრმა დაიწყო არსებობა. ინიციატივა "დავით ბეჟუაშვილის განათლების ფონდს" ეკუთვნის. საბადოს პარტნიორები ჯიაიჯი ჰოლდინგი და ევროპული სკოლა არიან.
რას ნიშნავს საბადო? განმარტებაში წერია: ადგილი, სადაც ბუნებრივი რესურსები მოიპოვება. საქართველო არ არის განებივრებული ბუნებრივი რესურსების სიმრავლით, მაგრამ გვაქვს სხვა უფრო დიდი რესურსი - ადამიანური პოტენციალი, რომელიც ამ ქვეყნის ყველაზე დიდ სიმდიდრეს წარმოადგენს. სწორედ აქ გვინდა რაც შეიძლება მეტი ლიდერი დაიბადოს.
რატომ მანგლისი? პასუხი ასეთია: "მე აქ დავიბადე და ეს სკოლა დავამთავრე"- ამბობს დავით ბეჟუაშვილი და განმარტავს, რომ "ყველგან შემეძლო გამეკეთებინა ასეთი ცენტრი, მაგრამ ავირჩიე ჩემი კუთხე." ამიტომაც გახსნის დღიდან საბადოს კარი ღიაა ადგილობრივი მოზარდებისათვის.
რატომ საგანმანათლებლო ცენტრი? შეიძლება საკურორტრო ზონაში სასტუმრო გაგვეკეთებინა, მაგრამ დღეს ჩვენ ყველაზე მეტად პროფესიონალებთან ერთად ლიდერები გვაკლია, ამიტომაც საბადო გახდა ლიდერობის აკადემია.
საბადო 14-დან 18 წლამდე მოზარდებისთვისაა განკუთვნილი. ასაკი, როცა მთავარ არჩევანს აკეთებს ადამიანი, გზაგასაყართან დგას - საით წავიდეს. ასეთ დროს პროფესიონალი, გამოცდილი ადამიანების რჩევა ყველაზე მნიშვნელოვანია, სწორედ ასეთი ადამიანები არიან საბადოს მენტორები. ცოდნა, ცოდნის გაზიარება და გამოყენება - ეს იქნება მთავარი, რასაც საბადოელებს ასწვალიან. მაგრამ როგორ ? საბადოში ამბობენ, რომ მიდგომაც განსხვავებული იქნება, არა საკლასო ოთახებში, არა ლექციებით. საბადო საინტერესო პროგრამებზე მუშაობს და ასეთივე საინტერესო სპიკერებს ეძებს მოზარდებისთვის.
საბადო აღჭურვილია უახლესი ტექნოლოგიებით, სტემ ლაბორატორიით, ფუნქციონირებს ობსერვატორია, სპორტული დარბაზები, ოთახები მსჯელობისა და კომუნიკაციისათვის, კინოთეატრი. აქ ყველაფერია, რაც საშუალებას აძლევს მოზარდს იპოვოს საკუთარი თავი.
